काठमाडौं । चीनको वुहानबाट सुरू भइ विश्वभर फैलिरहेको नोबेल कोरोना भाइरस (कोभिड–१९)ले महामारीको रुप लिईरहेको बेला कोरोना भाइरसबारे अनेक भ्रमहरु छर्न थालेका छन् ।
पछिल्लो समय नर्भिक अस्पतालमा कोरोना संक्रमित व्यक्तिको मृत्यु भएको र नेपालमा धेरै जना कोरोना संक्रमित भएको भन्दै सामाजिक सञ्जाल फेसबूकमार्फत एउटा अडियो भाइरल भयो ।
प्रहरीको केन्द्रीय साईबर ब्यूरोले कोरोना भाइरसबारे फेसबूकमा भ्रम सिर्जना गर्ने १ युवकलाई पक्राउ पनि गरिसकेको छ । पक्राउ पर्नेमा रामेछाप घर भइ भक्तपुर बस्दै आएका २० वर्षीय विवेक थापामगर छन् ।
त्यस्तै केही दिन अगाडि टेकुस्थित शुक्रराज ट्रपिकल तथा सरुवा रोग अस्पतालमा कोरोना रोगका कारण १७ जनाको मृत्यु भएको भन्दै टिकटकमा एउटा भिडियो भाइरल गरिएको थियो ।
कोरोना भाइरसबारे भ्रम छर्नेविरुद्ध प्रहरीले अनुसन्धान जारी राख्दा पनि पछिल्लो समय फेरि अर्को अफवाह भाइरल भइरहेको छ ।
सरकारले विशेष सैनिक हेलिकोप्टरमार्फत राति १२ बजेपछि कोरोना भाइरसको विषादी छर्ने भन्दै फेसबूक लगायतका सामाजिक सञ्जालमा अहिले अर्को अडियो र पोस्ट भाइरल हुन थालेको छ ।
नेपाली सेनाले भने हेलिकोप्टरमार्फत कोरोनाविरुद्धको औषधि छर्ने कुरा हल्ला मात्रै भएको बताएको छ । सेनाका प्रवक्ता सहायक रथी विज्ञानदेव पाण्डेले हेलिकोप्टरमार्फत कोरोनाको विषादी छर्ने विषय अफवाह मात्रै भएको बताए ।
‘सेनाले कुनै त्यस्तो तयारी गरेको छैन । सरकारले पनि त्यस्तो कुनै योजना बनाएको बुझिएको छैन,’ सैनिक प्रवक्ता पाण्डे भन्छन्, ‘यो सबै अफवाह (हल्ला) मात्रै हो । यस्तो हल्ला फैलाउनेलाई कानूनी दायरामा ल्याउनु पर्छ ।’
आफ्नो प्रतिकृया दिनुहोस्