जनकपुरधाम । टिकटकमा एकअर्काको धर्म–संस्कृतिलाई लक्षित गरी गरिएको अभद्र टिप्पणीबाट सुरु भएको विवादले मधेश प्रदेशमा तनावपूर्ण अवस्था सिर्जना गरेको छ। धनुषामा सुरु भएको घटनाको असर पर्साको वीरगञ्जसम्म फैलिँदा आइतबार बिहानैदेखि प्रदर्शन र झडपको स्थिति देखिएको छ।
धनुषा र पर्सासहित मधेश प्रदेशका आठैवटा जिल्लामा सुरक्षा सतर्कता बढाइएको छ। एक उच्च सुरक्षा अधिकारीले परिस्थितिलाई ‘संवेदनशील’ भन्दै सुरक्षा व्यवस्था कडा बनाइएको जानकारी दिए।
केही दिनअघि जनकपुरमा हैदर अन्सारी र अमानत अन्सारी नामका दुई युवाले टिकटकमा हिन्दुस्तानको नाम लिँदै धार्मिक सहिष्णुतामा खलल पुग्ने खालको भिडियो पोस्ट गरेका थिए। उक्त भिडियो आपत्तिजनक भएको भन्दै स्थानीय अगुवाहरूले दुवै युवालाई प्रहरीको जिम्मा लगाएका थिए।
इलाका प्रहरी कार्यालय खजुरीमा दुवै पक्षबीच छलफल चलिरहेको समयमा उनीहरू पक्राउ परेपछि केही युवाहरू आक्रोशित बने। त्यसै क्रममा धनुषाको धनुकमला नगरपालिका–६, सखुवा मरानस्थित मुस्लिम टोलमा रहेको मस्जिदमा तोडफोड हुनुका साथै मुस्लिम धर्मावलम्बीको पवित्र ग्रन्थ कुरान जलाइएको घटना भएको थियो।
धनुषाका प्रहरी प्रवक्ता डीएसपी गणेश बमका अनुसार मस्जिदमा भएको आक्रमणमा संलग्न एक जनालाई पक्राउ गरिएको छ भने घटनाबारे थप अनुसन्धान भइरहेको छ।
धनुषाको उक्त घटनाको विरोधमा पर्साको वीरगञ्जमा आइतबार बिहानैदेखि मुस्लिम समुदाय सडकमा उत्रिएको छ। वीरगञ्जको घण्टाघर, मुर्ली, छपकैयाको इदगाह चोकलगायतका स्थानमा प्रदर्शनकारीहरूले टायर बालेर नाराबाजी गरेका छन्।
प्रदर्शन उग्र बन्दै जाँदा छपकैयाको इदगाह चोकमा प्रदर्शनकारी र प्रहरीबीच सामान्य झडपसमेत भएको छ। स्थिति नियन्त्रणमा लिन प्रहरीले पाँच राउण्ड अश्रु ग्यास प्रहार गरेको थियो। सो क्रममा एक जना प्रहरी सामान्य घाइते भएका छन्।
प्रदर्शनमा सहभागीहरूले मस्जिदमा पसेर तोडफोड गर्ने र धार्मिक ग्रन्थ कुरान जलाउनेलाई तत्काल पक्राउ गरी कडा कारबाही गर्न माग गरेका छन्। छपकैयाको मदरशाका मौलाना असगर मदमीले नेपालमा धार्मिक दंगा भड्काउने नियतले पवित्र स्थलमाथि आक्रमण गरिएको भन्दै त्यसविरुद्ध आफूहरू सडकमा उत्रिएको बताए। उनले घटनामा संलग्न सबैलाई तुरुन्त पक्राउ गरी कानुनी दायरामा ल्याउन सरकारसँग माग गरे।
स्थिति तनावग्रस्त बनेपछि सुरक्षाकर्मी परिचालन बढाइएको छ भने प्रशासनले संयमता अपनाउन सबै पक्षसँग आग्रह गरेको छ।
आफ्नो प्रतिकृया दिनुहोस्