ललितपुर। महानगरीय प्रहरी वृत्त सातदोबाटोले रिसोर्टमा जुवा(कौडा) खेलिरहेका ७ जनालाई पक्राउ गरेको छ। ललितपुर जिल्ला गोदावरी नगरपालिका वडा नम्बर ३ स्थित बृन्द्रावन रिसोर्टको मिटिङ्ग हलमा जुवा खेलिरहेका उनीहरुलाई प्रहरीले पक्राउ गरेको हो।
ठाउँ फेरिफेरि जुवा खेल्ने खेलाउने सोम-कुमार समुहका जुवाडेहरु आज जुवा खेल्नको लागी गोदावरी थिए। जुवा किङ्ग भनेर चिनिने सोम लामा भने प्रहरीलाईनै कुटेर भागेका छन्।
महानगरीय प्रहरी वृत्त सातदोबाटोका प्रमुख प्रहरी नायब उपरीक्षक गौतम मिश्रका अनुसार १० लाख ८४ हजार ९ सय ५० रुपैँया सहित १६ थान कौडा समेत बरामद भएको छ। यस बिषयमा प्रहरीले थप अनुसन्धान गरिरहेको प्रहरीले जनाएको छ।
को हुन् जुवा किङ्ग सोम लामा ?
काभ्रे तिमालका सोम लामाले गत साता पिकनिकको नाममा काठमाडौंको मुड्कु भन्ज्याङमा जुवा खेलाउँदै गर्दा १९ लाख रुपैंया सहित पाँच जनालाई बालाजु प्रहरीले पक्राउ गरेको थियो । लामा भने फरार भए ।
पछिल्लो समय लामाको समूहले पिकनिकको नाममा जुवा खेलाउँदै आएको लामा समूहले एक दर्जन बढीलाई सेटिङमा जुवा खेलाएर लुटपाट समेत गरेको छ । गत साता मुड्कु भन्ज्याङमा प्रहरीले पक्राउ गर्नु अघिल्लो दिन सूरज तंडुकार भन्ने एक जुवाडेलाई पैसा जितेर निस्कन लाग्दा लामाको समूहले बन्दुक निकाली निधारमै ठोक्छु भन्दै धम्क्याएको सूचना अपराध महाशाखामा समेत पुगेको थियो ।
लामाले केही प्रहरी अधिकृतको नाम बेच्दै अन्य जुवाडेलाई धम्क्याउने समेत गरेका छन् ।
आफ्नो प्रतिकृया दिनुहोस्