काठमाडौं । नेपालका तीन पूर्वप्रधानमन्त्री र दुई पूर्वमन्त्रीसहित उनीहरूका परिवारको सम्पत्तिमाथि राज्यका निकायहरूले सूक्ष्म अनुसन्धान सुरु गरेका छन्। सम्पत्ति शुद्धीकरण अनुसन्धान विभागको पत्रका आधारमा नेपाल प्रहरीको केन्द्रीय अनुसन्धान ब्युरो (सीआईबी) ले यससम्बन्धी छानबिन अघि बढाएको हो।
प्रहरी स्रोतका अनुसार अनुसन्धानको दायरामा पूर्वप्रधानमन्त्रीहरू शेरबहादुर देउवा, केपी शर्मा ओली र पुष्पकमल दाहाल ‘प्रचण्ड’ रहेका छन्। त्यस्तै पूर्वमन्त्रीद्वय आरजु राणा देउवा र दीपक खड्का तथा उनीहरूका परिवारका सदस्यहरूको नाममा रहेको चल–अचल सम्पत्ति र आम्दानीका स्रोतबारे समेत प्रश्न उठाइएको छ। पूर्वमन्त्री आरजु राणाका भाइ भुषण राणालाई पनि अनुसन्धानको सूचीमा समेटिएको छ।
यो अनुसन्धान गत भदौ २४ गते भएको आगजनी घटनासँग पनि सम्बन्धित रहेको बताइएको छ। सो क्रममा पूर्वप्रधानमन्त्री देउवा, दाहाल र पूर्वमन्त्री खड्काको निवासमा जलेका नोटका टुक्राहरू फेला परेका थिए। घरमा ठूलो मात्रामा नगद रहेको संकेत देखिएपछि सम्पत्ति शुद्धीकरण अनुसन्धान विभागले प्रारम्भिक छानबिन गरेको थियो।
प्रारम्भिक अध्ययनमा केही कैफियत देखिएपछि विभागले थप विस्तृत अनुसन्धानका लागि प्रहरीलाई पत्राचार गरेको हो। सोही पत्रका आधारमा सीआईबीले सम्बन्धित व्यक्तिहरूको सम्पत्ति र आयस्रोतबारे गहिरो अनुसन्धान अघि बढाएको छ।
आफ्नो प्रतिकृया दिनुहोस्