काठमाडौं । नेपाल प्रिमियर लिग (एनपीएल) अन्तर्गतको आज (बुधबार)को खेलमा विराटनगर किङ्सको हार भएको छ।
कीर्तिपुरस्थित त्रिवि अन्तर्राष्ट्रिय क्रिकेट रंगशालामा आज भएको खेलमा चितवन राइनोजले विराटनगर किङ्सलाई ४८ रनले हराएको हो।
टस हारेर पहिला ब्याटिङ गरेको चितवनले निर्धारित २० ओभरमा ५ विकेट गुमाएर १७४ रन जोडेको थियो भने विराटनगर किङ्सले १६.५ ओभरको खेलमा १२६ रन बनाएर अलआउट भएको हो। विराटनगरको यो पहिला हार हो भने चितवनको दोस्रो जित हो।
टस हारेर ब्याटिङको निम्तो पाएको चितवनले निर्धारित २० ओभरमा ५ विकेटको क्षतिमा १७४ रनको योगफल खडा गर्यो।
चितवनका लागि रवि बोपाराले आक्रमक ब्याटिङ गर्दै ३८ बलमा ६५ रन जोडे। योसँगै जारी प्रतियोगितमा बोपाराले अर्धशतकको ह्याटट्रिक पूरा गरेका छन्। त्यस्तै सैफ जैबले ३२, देव खनालले २८, कप्तान कुशल मल्लले २९, डेविड मिलानले १७ रन बनाए।
विराटनगरका लागि मार्चेन्ट डी लङ र सन्दीप लामिछानेले २–२ तथा सुभव रन्जनेले १ विकेट लिए।
१७५ रनको लक्ष्य पछ्याउने क्रममा चितवनका रञ्जीत कुमारको तिखो बलिङसामू विराटनगरको ब्याटिङलाइन धारासायी भयो। रञ्जीतले पाँच विकेट हात पारे।
विराटनगरका लागि नवौँ नम्बरमा ब्याटिङका लागि आएका मर्चेन्टले २२ बलमा ३९ र दशौँ नम्बरमा आएका प्रतिस जिसीले १२ बलमा ३० रन बनाए। यी दुईबाहेक विराटनगरका अन्य कुनै ब्याटरले राम्रो प्रदर्शन गर्न सकेनन्। सैम हिजलेटले २२ रनको योगदान दिए।
चितवनका लागि कमल ऐरीले २, सोहेल तनविर, सैफ जैब र कुशल मल्लले १–१ विकेट लिए।
बिहीबार पहिलो खेल लुम्बिनी लायन्स र सुदूरपश्चिम रोयल्स र दोस्रो खेल जनकपुर बोल्ट्स र पोखरा एभेन्जर्सबीच हुनेछ।
आफ्नो प्रतिकृया दिनुहोस्