पूर्व पश्चिम राजमार्ग अन्तर्गत सवारी दुर्घटनामा परि प्रहरी निरीक्षक कपिल वाग्लेको मृत्यु भएको छ। बर्दघाट नगरपालिका–४ स्थित चेकप्वाइन्टमा सोमबार राति कार्यालयका इन्चार्ज प्रहरी निरीक्षक (इन्स्पेक्टर) कपिल वाग्ले आफै खटिएका थिए ।जिल्ला प्रहरी कार्यालय नवलपरासीका डीएसपी राजु लामाका अनुसार सोमबार राति सवा आठ बजेतिर मोटरसाइकलले उनलाई ठक्कर दिएको थियो ।
तीव्र गतिमा आएको मोटरसाइकलले पछाडिबाट वाग्लेलाई ठक्कर दिँदा उनी गम्भीर घाइते भएका थिए । उनलाई लु १४ प ८७५८ नम्बरको मोटरसाइकलले ठक्कर दिएको हो ।
गम्भीर घाइते भएपछि उनलाई उपचार गर्न भैरहवास्थित युनिभर्सल कलेज अफ मेडिकल साइन्सेसमा लगिएको थियो । उनको राति १० बजेर ५७ मिनेटमा मृत्यु भएको डीएसपी राजु लामाले जानकारी दिएका छन् ।
मोटरसाइकल चालक सुनवल नगरपालिका घर भएका १८ वर्षीय दिपेन्द्र पुन पनि घाइते भई उपचाररत रहेको डीएसपी लामाले बताए ।
तनहुँको म्याग्दे गाउँपालिका–४ घर भएका ४३ वर्षीय वाग्ले गत पुसदेखि इलाका प्रहरी कार्यालय बर्दघाटका प्रमुखका रुपमा कार्यरत थिए ।
आफ्नो प्रतिकृया दिनुहोस्