दाङ । दाङमा जिप दुर्घटना हुँदा एकजनाको मृत्यु भएको छ अन्य चारजना घाइते भएका छन् ।
घोराही उपमहानगरपालिका ३, मसोट खोलामा बिहीबार बिहान करिब साढे ५ बजे दुर्घटना हुँदा जिपमा सवार तुलसीपुर उपमहानगरपालिका १५ का १६ वर्षीय पदम वलीको मृत्यु भएको हो । उनको उपचारका क्रममा मृत्यु भएको प्रहरीले जनाएको छ ।
यस्तै, घाइते हुनेमा सोही वडाका जिप चालक ३८ वर्षीय भीमबहादुर वली, २६ वर्षीय देवराज वली, १७ वर्षीय विशाल वली र २४ वर्षीय गोपाल श्रेष्ठ रहेको जिल्ला प्रहरी कार्यालय दाङका प्रहरी नायब उपरीक्षक सुमित खड्काले जानकारी दिए ।
दुर्घटनामा पर्ने सबै एकै ठाउँका हुन् । प्रहरी नायब उपरीक्षक खड्काका अनुसार कपिलवस्तुको कृष्णनगरबाट तुलसीपुर जाँदै गरेको रा.१च ९६२ नम्बरको उक्त जिप अनियन्त्रित भई भित्तामा ठोक्किएको थियो । घाइते चारैजनाको अहिले राप्ती स्वास्थ्य विज्ञान प्रतिष्ठान घोराहीमा उपचार भइरहेको छ ।
आफ्नो प्रतिकृया दिनुहोस्