विरेन्द्रनगर । आरडीटी परीक्षण गर्दा नेगेटिभ रिपोर्ट आएपछि क्वारेन्टिनबाट घर फर्किएका एक जना युवकको मृत्यु भएको छ । भेरीगंगा नगरपालिका-५ का ३५ वर्षीय युवकको आइतबार बिहान मृत्यु भएको हो ।
भारतको हिमाचलबाट गत जेठ १६ गते फर्किएका उनी छिन्चुमा रहेको शारदा माध्यामिक विद्यालयको क्वारेन्टिनमा १४ दिन बसेर जेठ २९ गते घर गएका थिए ।
क्वारेन्टिनमा आरडीटी परीक्षण गर्दा नेगेटिभ रिपोर्ट आएपछि युवकलाई घर पठाइएको भेरीगंगा नगरपालिका नगर स्वास्थ्य प्रमुख राजेश बुढाले जानकारी दिए । उनलाई एक सातासम्म होम क्वारेन्टिनमा बस्न भनेर घर पठाइएको थियो ।
आज बिहान (आइतबार) ती युवकलाई एक्कासी झाडापखला लागेपछि छिन्चुस्थित गेणेश मेडिकलमा ल्याइएको र उपचारमै क्रममा उनको मृत्यु भएको स्वास्थ्य प्रमुख बुढाले बताए ।
उनको पीसीआर परीक्षणका लागि स्वाब संकलन गरी प्रदेश अस्पताल वीरेन्द्रनगर पठाइएको छ । पीसीआर रिपोर्ट आएपछि उनको दाहसंस्कार गरिने बुढाले बताए । युवकको शव प्रहरीको निगरानीमा मेडिकलमै राखिएको छ ।
आफ्नो प्रतिकृया दिनुहोस्