काठमाडाैं । उच्च पदस्थ व्यक्तिहरूलाई ज्यान मार्ने धम्की दिएको आरोपमा फरार रहेका प्रकाश पाठकलाई प्रहरीले फिलिपिन्सबाट पक्राउ गरी नेपाल फर्काएको छ ।
जिल्ला प्रहरी परिसर काठमाडौंका एसएसपी रमेश थापाका अनुसार पाठकलाई बुधबार फिलिपिन्सबाट त्रिभुवन अन्तर्राष्ट्रिय विमानस्थलमा नेपाल ल्याइएको हो । उनलाई लिन नेपाल प्रहरीको विशेष टोली फिलिपिन्स गएको थियो ।
जिल्ला प्रहरी परिसर काठमाडौं र इन्टरपोलको संयुक्त समन्वयमा फिलिपिन्सबाट पक्राउ गरी पाठकलाई नेपाल ल्याइएको प्रहरीले जनाएको छ ।
प्रहरीका अनुसार पाठकले अख्तियार दुरूपयोग अनुसन्धान आयोग, टंगालका प्रमुख प्रेम राईसहित १० जना उच्च पदस्थ व्यक्तिहरूलाई अल्टिमेटम दिँदै ज्यान मार्ने धम्की दिएका थिए । उनले भदौ २४ गते कारागारबाट भागेका कैदीलाई सुपारी दिएर हत्या गराउने धम्की दिएको अनुसन्धानबाट खुलेको छ ।
धम्कीसम्बन्धी घटनाको अनुसन्धानका क्रममा पाठक फिलिपिन्समा लुकेर बसेको पत्ता लागेको थियो । त्यसपछि इन्टरपोलमार्फत अन्तर्राष्ट्रिय तहमा खोजी तीव्र पारिएको प्रहरीले जनाएको छ ।
प्रहरीका अनुसार डिसेम्बर ३१ मा फिलिपिन्सको मालोलस सिटीमा फिलिपिन्स ब्युरो अफ इमिग्रेसनको फ्युजिटिभ सर्च युनिटले फिलिपिनी नेशनल पुलिससँग संयुक्त अपरेसन सञ्चालन गरी पाठकलाई पक्राउ गरेको थियो ।
यसअघि काठमाडौं जिल्ला अदालतबाट पाठकविरुद्ध पक्राउ पुर्जी जारी भइसकेको थियो भने इन्टरपोलमार्फत डिसेम्बर १२ मा डिफ्युजन नोटिससमेत जारी गरिएको थियो ।
नेपाल ल्याइएका पाठकमाथि अब धम्की, आपराधिक योजना र संगठित अपराधसम्बन्धी अभियोगमा थप अनुसन्धान अघि बढाइने प्रहरीले जनाएको छ ।
आफ्नो प्रतिकृया दिनुहोस्