काठमाडौं । काठमाडौँ, इलाम, धनकुटा र सोलुखुम्बुमा गरी चार जना व्यक्तिहरू मृत अवस्थामा फेला परेका छन्।
काठमाडौँ महानगरपालिका-९ सिनामङ्गलस्थित एयरपोर्ट होलिडे होटलमा नुवाकोट घर भएका ५९ वर्षीय धन राज मगर मृत फेला परेका हुन्। शनिबारदेखि होटलको कोठा नम्बर ५०७ मा बस्दै आएका मगर आइतबार सोही कोठामा मृत अवस्थामा भेटिएका हुन्।
त्यसैगरी इलामको माङसेबुङ गाउँपालिका-१ तोभाङका ४० वर्षीय डम्बर बहादुर कार्की सोही ठाउँको पाखा बारीमा आइतबार मृत अवस्थामा फेला परेका छन्। धनकुटाको साँगुरीगढी गाउँपालिका-१ मा पनि सोही ठाउँका ४० वर्षीय सूर्य विक स्थानीय खोल्सामा मृत भेटिएका छन्।
यता हिमाली जिल्ला सोलुखुम्बुको खुम्बु पासाङल्हामु गाउँपालिका-२ रातेमाटेका ५६ वर्षीय फुनुरू शेर्पा सोही ठाउँस्थित शेर्पा सामुदायिक वनमा आइतबार मृत फेला परेका छन्। यी सबै घटनाका सम्बन्धमा स्थानीय प्रहरीले आवश्यक कानुनी प्रक्रिया पुरा गरी अनुसन्धान सुरु गरेको जनाएको छ।
मृत्युको कारणबारे पोस्टमार्टम रिपोर्टपछि मात्र थप जानकारी खुल्ने प्रहरीको भनाइ छ।
आफ्नो प्रतिकृया दिनुहोस्