काठमाडौं । वैदेशिक रोजगारीको नाममा ठगी गरेको आरोपमा प्रहरीले काठमाडौँका तीन जनालाई पक्राउ गरेको छ।
पक्राउ पर्नेहरूमा सिन्धुपाल्चोक भोटेकोसी–३ घर भएका ३२ वर्षीय अमृत तामाङ, काठमाडौं महानगरपालिका–२४ बस्ने ४२ वर्षीय विशाल बज्राचार्य र लमजुङ दोर्दी–६ घर भएका ४९ वर्षीय पुड्के तामाङ रहेका छन्।
प्रहरीका अनुसार अमृतले बुल्गेरियामा पठाइदिने भन्दै १ जना पीडितबाट ७ लाख ५० हजार रुपैयाँ ठगी गरेका थिए। त्यस्तै, विशालले अमेरिका पठाउने बहानामा १ जना पीडितबाट ४ लाख ४७ हजार ५ सय रुपैयाँ र पुड्केले अल्बानिया पठाउने भनेर १ जना पीडितबाट ३ लाख रुपैयाँ लिएका थिए। रकम लिएर उनीहरू सम्पर्कविहीन भएका थिए।
पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले सोमबार अमृतलाई काठमाडौं–११ बाट, भने मंगलबार विशाल र पुड्केलाई काठमाडौं–१२ बाट पक्राउ गरेको छ। पक्राउ परेकाहरूलाई आवश्यक अनुसन्धान र कारबाहीका लागि वैदेशिक रोजगार विभाग, ताहाचल, काठमाडौं पठाइएको छ।
आफ्नो प्रतिकृया दिनुहोस्