धनकुटा । छथर जोरपाटी गाउँपालिका–२, फलैचामा आज आइतबार दिउँसो टेलर र टेम्पु आपसमा जुधेर भएको दुर्घटनामा दुई जनाको घटनास्थलमै मृत्यु भएको छ भने दुई जना घाइते भएका छन् ।
हिलेबाट जोरपाटीतर्फ जाँदै गरेको को२ह ६६११ नम्बरको टेम्पु र विपरीत दिशाबाट आइरहेको को१ख ६९१२ नम्बरको टेलर दिउँसो करिब १२ बजे ठोक्किएको प्रहरीले जनाएको छ ।दुर्घटनामा परी टेम्पुचालक धनकुटा–२ का २५ बर्षीय दशरथ पाख्रीन र टेम्पुमा सवार तेह्रथुम छथर गाउँपालिका–१ का ४२ वर्षीय साङ्गे शेर्पाको घटनास्थलमै मृत्यु भएको हो ।
टेम्पुमा सवार छथर जोरपाटी गाउँपालिका–५ का २२ वर्षीय रविन घिमिरे र तेह्रथुमको लालिगुँरास नगरपालिका–५ का २५ वर्षीय प्रदिप बस्नेत घाइते भएका छन् । उनीहरूलाई उपचारका लागि धनकुटा जिल्ला अस्पताल लगिएको जिल्ला प्रहरी कार्यालय धनकुटाले जनाएको छ ।
डोजर बोक्न प्रयोग गरिने टेलर र टेलर चालक संखुवासभा मादीमुलखर्क–५ का ३९ वर्षीय ज्ञानबहादुर गुरुङलाई सिधुवा प्रहरी चौकीले नियन्त्रणमा लिएको छ ।
आफ्नो प्रतिकृया दिनुहोस्