काठमाडौं– काठमाडौं, सुर्खेत, पर्सा र सन्चनपुरमा ४ वटा छुट्टाछुट्टै सवारी दुर्घटनामा परी ४ जनाको मृत्यु भएको छ ।
दुर्घटनामध्ये काठमाडौं महानगरपालिका–१० बिजुलीबजारस्थित सडकमा बा.४१ प ५३६ नम्बरको मोटरसाइकलले साईकललाई ठक्कर दिई दुर्घटना हुँदा गम्भीर घाइते भएका मोटरसाइकल चालक ललितपुर, ललितपुर उपमहानगरपालिका–१२ घर भएका ३७ वर्षीय अम्बरराज ताम्राकारको एभरेष्ट अस्पतालमा उपचारको क्रममा मृत्यु भएको छ ।
दुर्घटनामा घाइते भएका मोटरसाइकलमा सवार काभ्रे तिमाल गाउँपालिका–५ घर भई हाल कोटेश्वर बस्ने २१ वर्षीया निमा लामालाई सोही अस्पताल हुँदै थप उपचारको लागि ट्रमा सेन्टर पठाइएको छ । साइकलयात्री फरार रहेकोले प्रहरीले खोजी गरिरहेको छ ।
यस्तै सुर्खेत, बराहताल गाउँपालिका–५ चेपाङस्थित सडकमा ना.३ ख ५७४१ नम्बरको बसबाट झर्ने क्रममा सोही ठाउँ बस्ने ७२ वर्षीय हरिकला गाहाको सोही बसले किच्दा घटनास्थलमै मृत्यु भएको छ ।बस र चालकलाई प्रहरीले नियन्त्रणमा लिएको छ ।
यस्तै पर्सा, पोखरिया नगरपालिका–९ बैरीयास्थित सडकमा ना.११ प २१८१ नम्बकरो मोटरसाइकल अनियन्त्रित भई दुर्घटना हुँदा गम्भीर घाइते भएका मोटरसाइकलमा सवार बिन्दबासिनी गाउँपालिका–१ बस्ने वर्षीया प्रभावती देवीको नेशनल मेडिकल कलेज वीरगंजमा उपचारको क्रममा मृत्यु भएको छ ।
मोटरसाइकल र चालकलाई प्रहरीले नियन्त्रणमा लिएको छ ।
यस्तै कञ्चनपुर, पुनर्वास नगरपालिका–११ टाउके बजारस्थित सडकमा ना.३ ख ६६५ नम्बरको ट्रकको ठक्करबाट गम्भीर घाइते भएका पैदलयात्री सोही ठाउँस्थित अम्मरबस्ती बस्ने ७० वर्षीय कान्छो सुनारको सेती अञ्चल अस्पताल धनगढी कैलालीमा उपचारको क्रममा मृत्यु भएको छ । ट्रक र चालकलाई प्रहरीले नियन्त्रणमा लिएको छ ।
दुर्घटना भएका सबै स्थानमा तत्काल खटिई गएको स्थानीय प्रहरीले उद्दार कार्य गर्नुका साथै दुर्घटनाका सम्बन्धमा आवश्यक अनुसन्धान गरिरहेको छ । 
आफ्नो प्रतिकृया दिनुहोस्